粵式講波術語巡禮 日期：2010/08/06 03:27 留言者：Hawaiian 在網上看到一篇廣東話足球評述的慣用語,現節錄其中部分大家分享.同時補充以下三句,歡迎各位補充: 晒靴-----舉腳過高,源於靚次伯在封相的坐車功架. 打拉布------把波在半場傳來傳去,唔攻上去,消耗時間. 攞金像獎-----扮被對方侵犯. 　　足球，英文係ball，所以粵語又叫做波，足球評述員，廣東人會親切噉稱呼佢哋做講波佬。何輝、陳維聰、陳寧、江忠德……呢啲講波佬嘅名字，相信鍾意足球嘅廣東人都唔會陌生。 　　廣東人鐘意睇粵語講波，一方面因為相比於CCTV嘅宋世雄、韓喬生呢班係又「老師」唔係又「老師」嘅死板呆滯尖聲評球，粵語講波佬能夠營造一種輕鬆而舒服嘅傾談講笑氣氛；令一方面，「碧咸」、「朗拿度」呢啲叫法好聽過「貝克漢姆」、「羅納爾多」好多；但更主要嘅原因，重係妙趣橫生嘅粵式足球術語。下面就盡列出嚟同各位球迷分享。 1、腳嘅動作 粵語用字分工明細，取字精巧，單單係踢波用到嘅腳部動作，就有超過十個： 踢——泛指以腳向球作用呢個動作，下面嘅所有腳部動作都係「踢」嘅一種。 射——將球向某個明確嘅目標踢踢過去，通常指射門。 噍——用力射門，係「射」嘅生動講法。 鏟——通常指救球時用腳阻止球前進，或改變球嘅前進方向。 掘——喺邊/底線大力斬球入禁區嘅動作，如同用鏟掘地嘅動作。 刮——有意踢球嘅底部，令球飛起。 兜——有「刮」嘅意思，亦指以腳背將球踢出。 扌省——指球打中某人或球以某人為目標踢出，力度比較大。 搓——用腳踩球使其前后左右來回轉動以避開對方攔截。 擳——輕力將球彈畀自己隊友。 斬——用力將球提出，通常指龍門開球大腳開出。 拉——用腳將球加旋轉提出。 扯——一般指過頭嘅橫傳，進攻時大範圍轉移時時用到。 扌豆——球到時（通常唔係地波），視乎需要用腳輕輕將球彈高一定高度，以避過對方攔或傳球畀其他隊友。 2、頭部動作 踢波時七分腳三分頭，對於某啲頭叻過腳嘅球隊，例如德國隊、中國隊（應該講腳重屎過頭），可能五分腳五分頭添，所以頭部動作都唔少： 頂——泛指用球對球嘅作用。通常比較正路嘅頭錘動作都叫「頂」。 批——以一個唔同於球來向嘅力頂球，使球改變方向運動。而且「批」通常包含一個轉頭嘅動作，稱為「獅子搖頭」。 片——同「批」相似，只係以一個更薄嘅力嚟「批」。 跣——對飛嚟嘅球，用頭輕輕加力，使其去到合適嘅位置。簡而言之，就係用頭傳球。 鑿——係「頂」嘅一種，指用額頭將球頂向水平綫以下方向。 3、醫院波——傳唔到腳嘅波，令隊友隨時被人踢傷入醫院。 4、收山腳——顧名思義，一腳收你皮。 5、炒芥蘭——兩隻腳炒埋一齊，即係撞埋一齊。 6、開汽水——觀眾“噓”聲四起，全場氣氛就好似開汽水噉。 7、磨薑——響石地場射波時隻腳指畀地下刮親。 8、地莊——指一支球隊因有太多傷兵，喺冇得選擇之下，只好連續場比賽用同一班球員上陣。 9、高章——技巧高超，令人意想不到。多數形容後防球員，喺對方緊迫下，又唔大腳解圍，反而賣弄自己嘅腳法，結果畀對方偷去腳下球。 10、魚生粥——僅熟，險勝（如1-0，2-1）。 11、底線傳底——左/右底線斬中，中間冇人頂到個波飛到右/左底線或底線出波時唔夠腰力，隊友未能接應個波，個波已經墜番落底線。 12、球迷奇遇記——當眾人以為大局已定時出現估唔到嘅賽果。 13、濕手巾——起勢咁扭波。 14、叉燒——chance（原為排球術語）。 15、賣老抽——抽筋。 16、哨——球員不停走動，尋找機會。 17、痾蛋——守門員接波甩手，並從胯下將波漏入網。 18、牛油手 ------- 龍門線手, 經常接唔到波 19、彈琵琶——指龍門想抱住個波，不過抱唔實，球滑咗去兩邊。 20、暖水壺——戰術一種，「暖水壺係噉滾」，即不斷用高空球放至對方禁區務求「滾」得入球。 21、踩波車——球員唔小心踩到足球後失去平衡。 22、手榴彈——開邊線球時大力將波擲入禁區。 23、插花——形容球員控球用腳左穿右插, 避開對方攔截意圖扭過對方，巴西前國腳丹尼臣就系插花高手。 24、蛾眉月——禁區對出既半月形位置。 25、三閘線——將球場平分為三分約略所得出嘅界線。 26、K角位——由龍門中央到大禁區角所形成的直線，因與底線成一K字，故得名。 27、掛網——射門夠力，球順住球網嘅弧綫而入。 28、破網——入球速度勁，差啲射到網都破埋。 29、搋波——隊友之間不斷來回傳球。 30、紅牌阿姑——球員食紅牌。 31、鐵衛——非常強悍硬朗盡責嘅中後衛。 32、財星——應容實力差表演差之球員容易令己方失球，而使下注對方之波盤得以贏錢。 33、球場黑洞——指球員差劣表現，每當隊友傳球到佢腳下都有去冇回，失去控球權，與真正黑洞無異。 34、執死雞——形容入球補中，通常系己方首次試射未能入球，有球員於未有其他人作出反應時及時施射入球 35、推左走右——运球者將球踢向攔截者嘅一側，自己卻向另一側走過，以圖避開攔截者後再控返球。 36、通坑渠——帶球或射門時，球穿過對方球員兩腳之間。 37、入埋大細龍——形容入球穿過守門員兩腳之間（細龍）及入龍門（大龍）； 38、腳指尾拉西——用腳外側擦波，令球旋轉飛出，詳情請睇卡路士喺法國盃收死巴夫斯嗰球。 39、插水——扮嘢，多指球員扮作跌下搏取罰球，狀似插水。 40、打飛機——指射門高出目標甚多，高到連飛機都可以打落嚟。 41、雙鎗將——球員左右腳皆可熟練，左右拉弓，冇踢死一邊。 42、單蹄馬——指只識用左腳或右腳踢波嘅球員。 43、黃金右腳——形容球員右腳技巧了得。睇過《少林足球》者冇可能唔知呢個詞。 44、生蟲腳——形容因疏於練習，踢球嘅腳唔熟練 45、食糊——借詞自麻雀，指入球。 46、食詐糊——入咗球卻被判為無效。 47、窿對窿/交白卷——0 比 0。 48、風流波——因為目的已達到，任意而踢，爭勝心唔大。 49、打假波——賽事結果受控制嘅比賽，並非公平競賽。 50、送大禮——己方失誤造就對方入球 51、波係圓既——以此說明球賽未到最後難定勝負，伍晃榮名句。 52、太公波——替國家隊效力。 53、宴客——決勝時射12碼唔入。 54、笠死/笠入——笠，lob之聲譯，解作皮球成拋物線越過球員頭頂。 55、黃大仙——有求（球）必應。 56、炒波底——通常指射門時食唔應個波，踢左波底，其結果會系“打飛機”。 57、食波餅——指被去勢凌厲之球擊中，食波餅專指被扌省中面部。 58、單刀/半單刀——球員單人帶波射入，語出三國演義第六十六回「關雲長單刀赴會 伏皇后為國捐軀」。 59、「擔」位——迎頂高波時佔據咗對方球員嘅有利位置。 60、世界波——超靚入球，世界級水準 61、上身——指球員演出超水準（多指龍門），如有神助（神仙上身）。 62、撐龍舟——用頭將波頂去後面 63、高q大棍——長傳急攻戰術 64、白頭摩囉——當某位球員頭部受傷流血，要用沙布包紮，好似印巴人士一樣，就有此稱呼 65、黑哨——執法受質疑之球證。 66、掛靴——掛起球靴，唔再踢球，指球員職業生涯完結 67、斬波——大腳傳球 68、躂Q——來源於桌球，原指桌球杆打桌球時用唔到力，打唔正個波，Q諧音cue（球杆）。借到足球後，形容交波或射球時腳不應球，使球受力不足或改變方向 69、慢流尾袋——本身亦系桌球術語，指桌球慢慢碌入尾袋。引入到足球後，指波慢速碌入球門死角，守門員卻手長莫及，望球興歎。 70、老竇帶仔出街——大細（勢）已去。雖然球賽未完，但落後一方已無翻身之力。 71、銅牆鐵壁——形容後防穩健。 72、橫刀奪愛——側擊偷襲對方。 （歡迎補充）

Page: [1] [2]

< 回上一頁

Re: 粵式講波術語巡禮 ( No.4 ) 日期：2010/08/06 18:20 留言者：Hawaiian 草日兄: 其實還有好多,一時記唔起啫. 以前多係聽港台盧振喧葉觀��(大聲葉)講波多,後來加入何鑑江,不久又加入林尚義,到何靜江時本人已移民.當時商台有鮑景賢,麗的有潘耀章,始終都係聽港台多啲. 你聽過類似以下的評述未? 盧振喧: 阿香(張子岱)擸住個波,帶咗兩步交被阿平(張子慧),阿平撞牆式交被左輔位既潺仔國(張耀國),呢條濕手巾死扭,過咗一個,兩個,重想過第三個,唔得,撥橫被鄺演英呢個球場何非凡,查撐,的撐,大唱碧海狂僧,落到底線大腳刮出來,阿華田(區彭年)一個窩利”趙”埋去!去咗邊呀?大聲葉! 葉觀��: 去咗天后廟----賀誕呀! 龍門球開出,被阿平截到,一個割草式射埋去,被閂番出來,彈咗去邊線,被阿香用腳背兜到,第一時間橫傳過來,嘩!一個!兩個!三個!三個星島球員喺度,全部好似我屋企騎樓----大漏呀! 辣雞洪(曾鏡洪)慶嘞!嘩!鑑粗哩吔!呢下何臣都睇得到呀.曾洪猛向球證Sa Lum. 轉眼又三四十年咯. Re: 粵式講波術語巡禮 ( No.5 ) 日期：2010/08/07 23:01 留言者：草日 一哥: 我細個時當然聽過盧振喧同大聲葉(葉觀楫)講波，阿香阿平兩兄弟曾到英國黑池揾食，後來回港兩人都發了福，隨歲月漸走下坡。真是往事如煙！ Re: 粵式講波術語巡禮 ( No.6 ) 日期：2010/08/08 14:01 留言者：Hawaiian 草日兄: 時光如白駒過隙,少年不知愁,點會感受到?今驀然回首,往事如一盒錄影帶在播放.當年的黃毛小子,今己兩鬢星霜. 當年張氏昆仲在星島時是顛峰時期,依稀記得當時的陣容: 龍門---張劍思之後朱柏和擔正,神和扭計由何容興坐正. 後衛----謝國強李炳德 左右中衛唔記得係邊個,中堅譚漢新. 前鋒由右至左:右翼區彭年,右輔張子岱,中鋒張子慧,左輔張耀國,左翼鄺演英. 當時還未有新的戰術,一開場盧振喧必把陣容報上,聽慣聽熟. 葉觀楫因為經常鬧球證,(球證問題由來己久,到今時今日世界杯咁重要賽事一樣烏龍百出),得罪了當時的足總,流浪斑主畢特利勢力最大.所以被迫封咪,最後的臨別贈言可以聽出是百般無奈同傷感,(當然唔似張基,在亞洲電視最後一次賽馬節目咁,哭到出唔到聲)最後聽到大聲葉把聲係佢在澳門講回力球,之後本人移民了.葉觀楫本身係香港公務員,聞說係工務局幫辦.唔知是否仍健在呢? 間中也有留意下香港足球,與以前的盛況相比,真令人不勝唏噓! Re: 粵式講波術語巡禮 ( No.7 ) 日期：2010/08/08 14:53 留言者：Tang RE: NO.4 Hawaiian,你講起波來十分生鬼! Re: 粵式講波術語巡禮 ( No.8 ) 日期：2010/08/08 18:02 留言者：Hawaiian Tang Sir: Hawaiian唔識講波,只係凴記憶將盧振喧葉觀楫兩位的說話重覆啫,佢兩個講起來精采百出.你可能出世遲,未聽過呢兩位講波.當年一開波,通街通巷都聽到呢兩把聲,這是他們成功之處,把一場悶戰講到精采絕倫,繪聲繪影,令場外的球迷如身置場內一樣.有次把收音機帶入場,一邊睇一邊聽,哈哈!!!!!聽到的同睇到的完全唔同. Re: 粵式講波術語巡禮 ( No.9 ) 日期：2010/08/08 18:31 留言者：Tang Hawaiian , 我有幸也聽過葉觀楫講波. 你說:"有次把收音機帶入場,一邊睇一邊聽,哈哈!!!!!聽到的同睇到的完全唔同." 厲害 ! 足見他們功力深厚, 講到出神入化! 我最喜歡聽逸趣舊聞, 你是這方面的表表者啊! 日後, 希望你作更多的分享! Re: 粵式講波術語巡禮 ( No.10 ) 日期：2010/08/09 02:44 留言者：Hawaiian Tang Sir: Hawaiian活了一把年紀,好嘢就冇乜,只是經過咁耐日子,見過一些事物.有些事物現在聽起上來好似係笑話,可以話係天方夜譚.六十年代早期初到香港,時常見在報上有人登啟事,題目係:”警告逃妻”,內容係對出走的妻子警告,大多數命令其立刻返家.你話今時今日睇來係唔係笑話? Re: 粵式講波術語巡禮 ( No.11 ) 日期：2010/08/09 12:11 留言者：Tang Hawaiian , 「警告逃妻」啟事, 在今日來看的確匪夷所思! 聞說昔日新馬與情僧演粵劇時, 電台時有直播, 每當他們大唱主題曲時, 的士司機會暫停做生意, 是否真有其事, 你有聽過嗎? Re: 粵式講波術語巡禮 ( No.12 ) 日期：2010/08/09 17:33 留言者：Hawaiian 的士司機是否暫停做生意聽主題曲,估計係有的,可能只係個別.經人誇大變成整個行業.初到香港頭幾年,根本未搭過的士,冇銀之故.九龍方面起旗一元,港島個半.對一個幾十元一個月的學徒,是奢侈的消費.巴士全程三毫,分段一亳.”一亳坐晒!”係售票員叫買分段票的人落車.每日早花三毫,米王(白粥)一亳,大石(鬆糕)一亳,炸一一亳.炸兩係一孖油炸鬼包腸粉,炸一把油炸鬼分半.一星期才捨得食碗牛肉粥,把碎牛肉同炸粉絲揸勻淥粥,唔知現在還有冇呢種粥呢? 接触的士,係因為有一個花名叫”沙撈豬”的師叔轉行做的士司機.佢揸金邊的士,公司在窩打老道的曾榕大廈,離先師的舖好近,經常交了更就走埋來吹水.六七年暴動,老細要結朿金邊的士,把車連牌轉讓被伙記,每部三千,可分期付款.師叔只要了一部,後來呻笨!當時形勢立立亂,今日唔知明日事.何文田勝利道,梭枒道,太平道,自由道…..一帶,大量樓求售.每層萬零銀.有早知,冇乞兒,真係冇錯. Re: 粵式講波術語巡禮 ( No.13 ) 日期：2010/08/09 20:24 留言者：Tang Hawaiian, 你以前跟隨哪個行業的師傅學師? 你說把碎牛肉同炸粉絲揸勻混入粥, 現在有些粥店還有這種粥出售, 又或現在我們吃艇仔粥時, 都可吃到你所說的材料. 昔日的大排檔, 我還記得有豬油撈飯 (名字可能不正確), 與醬油混成一起,味道蠻好, 因愛它價錢便宜, 小時候, 我最愛吃! Re: 粵式講波術語巡禮 ( No.14 ) 日期：2010/08/10 00:28 留言者：Hawaiian 打銅 Re: 粵式講波術語巡禮 ( No.15 ) 日期：2010/08/10 16:22 留言者：Tang Hawaiian 師傅, 多謝相告! 現在的銅器製造, 相信大部份已由機器代替人手了, 是嗎? 昔日香港的輕工業 / 手工業, 今日仍碩果僅存的, 不知還有哪些行業呢? Re: 粵式講波術語巡禮 ( No.16 ) 日期：2010/08/10 18:02 留言者：Hawaiian 這個行業在香港己式微,可以話係後繼無人.不知現在那個行業還有人肯學師?舊式學徒制度當然有很多缺點和不足之處,但也有其的價值.一般是三年制,起初覺得係搵笨,尤其是未曾經過這階段的外人.頭一兩年只是與一個雜工無異,煲茶,掃地,買材料,煮飯….等等,或者做些頭頭尾尾的工作.到最後一年方正式有嘢做,但是有時還要有大工師傅傍住.唔係似職業學校一步一步教.其價值在那?就是學會如何靈活熟習使用工具,第二是如何應變,即係所謂執生,一句講晒:累積經驗.加上在行上建立人脈網絡,日後謀生容易.舊式制度比較有人情味,大多數為師的對徒弟視子侄,三年同食同住,感情由此建立. 其實做手作無他,最重要係尺寸準,其他步驟隨自己心出而變化.有時做了一樣嘢,或者成世人都唔會做第二次.本人曾用銅片敲打出半隻鹽焗雞的型狀,是一間大酒樓的商標,一生人就是這一次. 現在很少用銅了,因銅要經常用省銅水擦才能保持光澤,不�z鋼無此需要.本人師父是專做遊艇裝修,香港第一個影星有遊艇,也是經手裝修的,所以和此人頗熟.後來自立門戶專裝修酒樓.移民後做過其他,但桐油埕始終裝桐油,不過以木材為主,做手作一里通,百里明.識炒飯冇理由唔識炒粉麵. 機器只能制成一批一批的成品,是不能完全代替人手的. Re: 粵式講波術語巡禮 ( No.17 ) 日期：2010/08/10 19:21 留言者：Tang 零光片羽滿情味 Hawaiian 師傅, 我很喜歡聽你的分享! Re: 粵式講波術語巡禮 ( No.18 ) 日期：2010/08/11 02:59 留言者：Hawaiian Tang Sir: Hawaiian好多謝你肯聽本人噴口水,不過這些生活瑣事,平平無奇,唔值得講.而且文化水平有限,唔懂得用精簡來表達,變成又長又臭的懶婆娘包腳布.悶死好多人,Hawaiian雖是老粗一名,倒也識趣,唔好意思再干擾他人.

Page: [1] [2]

< 回上一頁

- 阿立粵曲天地 -

聲明