世界末日 |
日期:2012/03/31 03:58
留言者:Hawaiian
|
與友人吹水,佢問,對所傳得好勵害今年年尾(其實佢有一個日子話出來的,不過Hawaiian冇心裝載,所以唔記得)世界末日點睇?究竟係唔係有世界末日呢?Hawaiian反問佢,你信唔信?如果信,不如把你名下所有財產轉贈給Hawaiian,起碼在你毀滅之前有人向你感謝,證明你存在過,你都走得心安一啲.萬一到時預言唔靈,會把九成的財產還給你. 世界是否有末日?呢個問題傳過N次,結果大家得啖笑,預言者患有嚴重失憶症兼面皮夠厚.如果話有,要點就是點樣去理解”世界”一詞,包括什麼,如果話人類就是世界,咁就係有末日的.如果話係地球消失就係末日,咁就不一定有.地球存在了幾多年或重有幾多壽命?冇人可以話得出.科學家都係好似Hawaiian買馬,凭一些資料去靠估.以前係有過恐龍時代,你估恐龍的智商有冇現代的人咁高呢?可能當時有,或者有恐龍預言過世界末日,結果恐龍世界真係冇咗喎.之後又唔知有過幾多次不同形態的生命出現在地球,佢地的世界末日又重覆出現過.到了後來才出現人類,也只不過係幾千年的事.照咁講,人類的末日係會出現的,不過唔係傳說中咁樣,一下子全部消失晒,而係逐漸逐漸消失.除非係打核大戰,其實人類現在都係慢慢在毀滅自己,核爆啦,破壞生態環境啦,胡亂浪費有限資源啦,污染空氣水源食物等生活所需啦…..等等.慢慢搞到環境令人類無法生存,就絕跡在地球,咁咪係人類的世界末日咯.不過到那個時候,一定又有能適應地球環境的生命在地球生活,若干年後,又到佢地的世界末日,一齣一齣咁演下去……. 咁現在應點做?如常生活可也,反正目前的環境還能生活下去.
|
| |