 Re: 真的談天說地 ( No.1446 ) |
日期：2015/08/11 13:34
留言者：KC
 |
友成兄係咪講果間高街精神病康復中心呀？以前中大聯合書院剛同崇基，新亞聯埋組成中文大學，聯合書院就借用了康復中心隔離間屋做校舎！
馬料水中大現址都未動工，只有崇基舊校！新亞在農圃道，在馬頭圍啩（？）
果陣有一時段，D精神病康復者會在聯合校內的藍球場打波，兼曬太陽！
KC就周時同當年香港代表隊選手潘克廉先生打藍球！佢當年剛留學美國回歸，做了我校體育主任！後來在丅VB講每日一字成名的林佐瀚就是我地藍球腳！
KC仲定射周時嬴倒汽水飲！
  |
|
| Re: 真的談天說地 ( No.1447 ) |
日期：2015/08/11 13:55
留言者：KC
|
記得當年在籃球場踢足球，就有同屆的許冠文，而家佢就人人皆識啦！
同屆還有個殷巧兒，後來在電視台任職！早幾年還見過佢唱粵曲出騷！
當年聯合書院的劇社好有名，人材輩出！因為文學院有位姚克敎授寫了一套劇，叫清宮殘夢也！
近日在海報區，見一位移居了星加坡的舊友張澤明兄作了數首粵曲出騷！
再見故人！喜不自勝！
KC即錦祥也！小姓黃！
|
|
| Re: 真的談天說地 ( No.1448 ) |
日期：2015/08/13 14:20
留言者：KC
|
中大歲月
KC在六五年入讀中大聯合書院, 當時校舍在高街精神院隔離的政府建築物, 還未遷入馬料水.
校舍很細, 好處是很容易認識其他學系的同學, 同KC同年進入聯合後來又為大家認識的校友包括了許冠文, 殷巧兒等, 他（她）們是校內劇社的社員, 後來在話劇界有名的還包括馮祿德, 鄧偉雄等.
有一年理學院有一劇在每年都舉辨的話劇比賽得獎. 叫做 三根火柴 , 劇本就是小弟提供的了.
當年小弟讀書未忘玩樂, 舉凡校內舉辨的, 五人籃球場足球賽, 乒乓球爭霸戰, 排球學界比賽, 中國象棋學界大賽（联合書院代表）, 大學辯論比賽, （為联合書院主辯）, 全部都有份参輿, 都算是KC個人玩樂之黃金歲月也.
難能可貴的是, 居然還可以用四年, 完成物理系學士課程, 仲係有榮譽果隻.
當時同年有二十人, 一同考進此系, 能四年完成者只得四人而已（其他人一係要讀五年以上, 一係成績太差要退學.）, 而有榮譽學位只得两人而已（1969年）.（另一人是蔡克任兄, 今已失去联絡矣！）
联合書院當年校長是鄭棟材先生, 係政府派來的官員, 而联合書院的前身是幾所私立大專联合組成, 所以就叫做联合囉！
中大除联合書院以外, 還有在土瓜灣農圃道的新亞書院, 在馬料水的崇基書院,中大最初只此三家而已.
到了七一, 七二年, 联合書院, 新亞書院, 才一齊遷入在馬料水（即現今的大學站）.
在科學館的日子, KC當時己做了中大電子系, 最初幾個助教之一了, 當時電子系的系主任, 就是後來中大第三任校長高錕博士了.
第一任是李卓敏教授（他的弟弟是李卓皓, 是國際知名生物學家, 也是小弟培英的學長）第二任是馬臨教授, 也是我讀書時, 化學系的系主任.
第二任, 第三任中大校長, 也曾在联合書院做過系主任也.
另一位股市知名教授是樂秀章教授, 他創辨的香港天線和香港電腦, 真係科學泡沬的先鋒也.（小弟就是在他做系主任時的物理系畢業.）
 |
|
| Re: 真的談天說地 ( No.1449 ) |
日期：2015/08/12 20:57
留言者：KC
|
工厰歲月
KC第一份工作, 就是在安培泛達(AMPEX)做助理工程師, 當年入職人工一千零五十元正,但如果當年肯做老師（教中學）有一千七百五十元, 有一段時期, 我很後悔不去教書. 賺多D錢！
在工厰做, 又要加班, 又要打咭, 真係辛苦死矣！（結果做了年半, 都係走返中大做了年半助教, 收番一千七百五十元一個月, 此乃後話！）
當年安培泛達做的是電腦磁環記憶系統, 要在磁環內穿上幼幼的銅線, 很費人力,所以由美國搬來香港做.
當年電子厰有厰車, 有飯堂, 冷氣工塲, 福利好好嫁.而且人力唔夠, 介紹一個女工做滿三個月, 介紹人可得女工一個月的人工獎金, 又周時舉辨舞會, 周日有旅行, 做女工都幾好嫁！做工程師就辛苦好多了.
安培泛達在工業界也培養了不少人材, 例如後來做到行政局首席的李鵬飛先生啦, 上市公司偉易達的黃子欣先生啦, 上市公司依利安達的蘇章盛先生啦, 工業界很多工程人才, 都出自這所電子工程師的少林寺.時至今日, 依然有好多曾在安培泛達做過的人在工業界任職.
KC在職時, 正是工厰年代的黃金歲月, 很多人靠工厰生活, 也有好多人賺了錢, 發了達. 除了電子業, 製衣業, 各類製品業都好好景也, 真係唔憂冇工做的年代也.
到了後來大陸開放, 工業北移, 又是另一景象了.（那時KC已經在理工教書矣！）
|
|
| Re: 真的談天說地 ( No.1450 ) |
日期：2015/08/13 12:11
留言者：KC
|
理大生涯
KC在理工大學教了二十八年書, 以往理工叫做理工學院, 前身是工專, 是為工業界培養人才的學府.
以往只有專業文憑及專業証書, 文憑又分高級文憑和文憑, 而証書卻有高級証書和普通證書的分別, 既有日校制, 也有夜校讀, 更設有部份日間課程, 方便在職人仕供讀. 工業界至今依然有好多人在理工讀過.
KC任教的學系原本叫電子工程學系, 但後來科網狂潮, 為了吸引學生申請, 改稱為資訊及電子工程學系, 後來更昇格為理工大學.
有一段時期（在梁錦松主持做大學及理工撥欵委員會什麽什麼時, 又在建华哥好大喜功的年代, 理工要做東南亞MIT, 要D老師人人爭做什麼愛因斯坦,又發明什麽什麽計PAPER法, 搞到學界浮跨成風, 做咗好多無謂嘢！搞到有D老師太專心寫PAPER, 連教學生都冇心機！非常反智！
近年似乎又再踏實咗（可能自從KC退休後, 勤力做嘢D人多咗也.）, 而家中大, 港大, 科大做理論研究, 理大, 城大做專業應用, 似乎走了回頭路, 不再大攪出PAPER斗多遊戲了.
|
|
| Re: 真的談天說地 ( No.1451 ) |
日期：2015/08/13 12:57
留言者：丫頭
 |
很喜歡KC談談年青時的人和事，畢竟在懷舊電影看到的只有一麟片爪哩！ |
|
| Re: 真的談天說地 ( No.1452 ) |
日期：2015/08/13 13:02
留言者：KC
|
千七狂潮
在KC六九年大學畢業後, 桓生開始在股票市場設有桓生指數, 最初開始是100點.
而當年買股票很艱難, 交易所包括, 港會交易所, 九龍會交易所和遠東會交易所三間交易所, 港會是服務傳統大客, 遠東會比較普及, 而九龍會似乎就比較少客幫襯.
當年買股票要經股票經紀, 边有而家咁公平, 公正, 公開, 好多時都有人投訴经紀食價, 昇市賺咗, 又話買唔倒, 有好多漏洞.
由我初初買股票（70年代）, 股票漸漸普及起來, 到七三年, 到達瘋狂歲月, 股市到達千七點, 全城連擦鞋仔都講股, 好多在銀行金融業的人, 不務正業, 入市炒股, 日日魚翅撈飯. 新股上市成一時之盛, 有人揚言, 就算揾條狗上市集資, 一樣大把人買.
KC的老師樂秀章教授, 有兩隻科學股, 香港天線及香港電腦, 一樣由一元炒到三十多元, 银行收投新股的支票, 要用裝生果的紙箱收, 認真化學！全城瘋狂！
當年D人根本冇乜所謂技術分析, 又冇乜知識, 俾D大鱷呃, 又俾D經紀呃, 政府明知失控,只出指引叫公務員咪炒股, 又派消防員去交易所, 去淋熄吓D太慹情的股民.
結果一個石油能源危機！股市散晒, 由千七點直插百五點！此役大把人破產！更加好多人輸到跳樓！這就是桓生指數千七點的歷史狂潮了！
KC有幸近日再見到A股大時代, 歷史原來可以重演的！
|
|
| Re: 真的談天說地 ( No.1453 ) |
日期：2015/08/13 21:02
留言者：KC
|
張澤明兄在港大畢業, 七十年代, KC 曾與他在安培泛達做過同事！
最近在海報區, 居然見佢作曲俾人出show！犀利！
因當年從未知, 原來大家有此共同興趣也！
後來張兄移民星加坡, 多年失去联絡矣！
|
|
| Re: 真的談天說地 ( No.1454 ) |
日期：2015/08/13 22:58
留言者：KC
|
九七回歸
KC認為, 作為香港此一代人, 最大的不幸是遇上了九七大限！
由八四年開始了中英談判, 香港人就要思量, 是否接受大陸的統治, 中共立國以來的三反五反, 文革狂熱的確嚇死人. ！
很多領過政治的禍害的人, 都想一走了之, 很多家庭因為移民, 弄至妻離子散,家不成家！
有次看見李司祺小姐的訪問, 談及她當年因坐移民監, 老公移情別戀（司祺姐咁靚都死！等而下之, 可想而知.）連女兒也同佢產生誤解, 痛不欲生！一生幸福冇晒, 回流再嫁, 又搞到離婚, 仲生埋癌, 真係苦情之至！好彩, 近年星運轉紅, 行個晚運！算是好彩矣！
至於移民故事, 真係講十日十夜也說不完！
但留港者, 也好不到很多, 一樣要經歷八九民運, 民主爭議, 臨時立法局風雲, 建华七年, 沙士大難, 貪曾歲月, 思歪年代, 政治不穩定, 經濟不穩定, 近年佔中事件, 社會分裂！爭議頻頻！鑊鑊新鮮鑊鑊甘！
時至今日, 能有餐安樂茶飯食, 大家都應感恩矣！
|
|
| Re: 真的談天說地 ( No.1455 ) |
日期：2015/08/14 09:36
留言者：KC
|
九七烟火
九七年六月三十號晚, KC守在電視機前, 一路觀看英國人離去的傷感, 一方面欣賞解放軍進駐的雄姿！在會展有交接儀式, 在立法局的露台有民主黨的抗議什麼什麼的集會！
大冢居然相安無事, 一边有民眾玩歡迎解放軍, 一边又有人反對中國什麼什麼的（己經忘記了是反對冇直通車, 還是反對臨立會了）！
英國人巳玩不出什麽花樣了, 而香港這班所謂民主派也只能號召得數千人玩燭光晚會.
大部份人在家看烟花, 看直播換區旗區徽, 七月一日真係乜事都冇, 好似還可以放假一天添！咁就送走了英國佬！真係偉大！
其實一個國家弱, 根本就無道理可講, 君不見, 英美打伊拉克的理由, 話人有大殺傷武器, 連人地總统都捉埋, 一樣揾唔倒, 成個世界冇人再問點解？這就是強國的道理了！
當年阿根廷收番自已一小島, 被英美联手打到散晒, 香港如非中國鄧小平仲有D智慧, 香港想回歸祖國就難矣！
你睇吓中英談判英國佬同的小動作, 和一些唔開竅D人的提議, 時至今日也不肯合作玩政改, 就知回歸不易也！
而家香港人可以安身立命, 其實都要好多人有智慧先得嫁！
而家香港最緊要, 就係大家要有DD智慧, 四四六六折掂佢！而唔係各持己見, 玩殘佢！
|
|
| Re: 真的談天說地 ( No.1456 ) |
日期：2015/08/14 11:40
留言者：Hawaiian
|
那年正在香港工作,本來六月尾就回來.但要見證這日,逗留多三四日.回歸日正下暴雨,市面上靜英英,大多數人在看電視機.彭定康滿面凄然,坐慕蓮夫人號離開,可能此時佢在唸李後主首詞:最是倉皇辭廟日....
那日的暴雨,如果有兩派人去問"玄學大師".
擁英派得到的答案是:這是天哭,是對回歸感到悲哀.
擁中派得到的答案是:這是天威的顯現,令到所有城狐社鼠縮在家中不敢上街.
假如KC兄去問,會有乜答案呢? |
|
| Re: 真的談天說地 ( No.1457 ) |
日期：2015/08/14 19:38
留言者：楓林月
 |
KC回首當年, 那一代香港人的精神面貌和現在差別真大. |
|
| Re: 真的談天說地 ( No.1458 ) |
日期：2015/08/14 22:12
留言者：KC
|
火紅年代
中共在一九四九年在毛澤東在天安門高呼中國人民站起來了, 開始了所謂新中國的年代！
隨着的十年八年, 在文匯報, 大公報, 新晚報,商報等等左派傳媒宣傳下, 當時香港有一部份人是對新中國充滿了希望的.
左派在香港有左派學校, 如培僑, 香島, 漢华, 中华, 勞工子弟學校, 福建等等,所謂愛國教育, 自成一教育系統.有D學生左到不考香港會考, 返回新中國如清华, 北大讀大學, 在廣東多去暨南大學.
勞工界, 銀行界都有左派的企業, 工會也分左派右派, 勢成水火！
KC有位街坊牛伯, 是左派煤氣工會的𢦓員, 在煤氣公司做木工, 某年嚮應大罷工, 一罷卻不能復工！
從此只有靠工會接濟, 初時每月有資助, 有米粮, 後來日子耐咗，卻不了了之, 由得佢個人斗爭到底！
還幸牛伯老婆牛媽做洗衣服, 養大二子一女！
KC看在眼裡, 從此不相信政治宣傳！﹝一切政治, 宗教宣傳, 咪鬼搞我！﹞
街中有一巴士司機, 相信了新中國的宣傳, 舉家遷回大陸建設新中國.
出發前一晚,十來歲的兒子, 在街上發狂搞事, 弄到全街圍觀, 可能是動物本能, 身赴危難, 自然反應也！
後來據說一家在國內慘不堪言！而家都不知所終了！
火紅年代到了文革歲月, 全國政治又大变矣！
而家新一代D傻瓜, 去同中共玩政治, 真係買棺材唔知碇也！
|
|
| Re: 真的談天說地 ( No.1459 ) |
日期：2015/08/15 10:22
留言者：KC
|
不務正業
理想的工作, 就是不用怎樣工作, 就可以交差的工作, 收入不俗, 衣食無憂, .餘下來的時間可以發展自已的興趣, 例如唱歌, 跳舞, 做戲, 種花, 練武, 做生意, 炒呢炒路, 諸如此類, 不務正業！
在KC工作的年代, 頗多工作是這個類別的, 如做公務員, 郵局職員, 老師（尤其是官校老師）, 大學講師等等！
就說KC自已, 教完了幾節書（每周）, 就可以做自己喜歡的事！根本冇乜壓力叫你做D由長官定的目標, 自由發揮, 你喜歡研究本行, 攞諾貝爾獎都無人監你.你唔鍾意, 去研究埋D唔等使嘅都冇乜所謂, 總之百花齊放, 原來咁至可以令各種不同類型的人發揮所長！
原來不務正業才會有成就, KC有位老師（其實係好幾位）靜靜鷄做工業, 結果當今最大的液晶體厰就做咗出嚟！
我有D同事走咗去炒樓炒股票, 結果就四十歲前, 退鬼咗休, 因為炒嘢至係佢強項, 發達易過借火！
又有D同事吹口琴, 玩音樂, 唱歌出晒名, 其中一個後來仲做埋藝術學院院長添（好似叫做盧景文啩）！
可見不務正業, 成就仲大, 寫書嘅寫書, 讀書嘅讀書, 如果當年我唔係讀埋讀埋咁多書, 而家都冇咁多嘢寫啦！
可憐而家D人, 正業都做唔掂, 做乜鬼副業吖！
呢個社會是否出了什麽問題？
|
|
| Re: 真的談天說地 ( No.1460 ) |
日期：2015/08/16 16:12
留言者：KC
|
八婆鬧仔
近來香港頗多爭拗！成日嗌交！
細時KC見街中的八婆（大嬸）鬧仔, 都好頂癮嫁！
最經典的一句就係: 衰仔, 冇鬼用嫁你, 生舊义燒好過生你！（當年小弟最鬼鍾意食义燒, 但一諗到可能係佢生嘅, 就立即冇晒胃口！）
大嬸（八婆通稱）鬧仔, 有時都好鬼毒嫁！
衰仔, 病仔, 死仔, 仆街仔, 就例牌有, 而有時居然咒罵！
話: 咁多人死又唔見你死！係死就快D嘞！可以慳番D米飯！
有時仲毒！
話: 要死就快D死嘞！趁地淋！﹝呢句而家好少人識用, 以前土葬, 要掘個窿,地淋好作業也！﹞可見大嬸都幾有創意！
當然, 大嬸亦非有惡意, 純屬發洩情緒！
而小童被鬧完亦鮮有自尋短見！反而積極玩斗如故！
反觀而家D靚（平声字）仔靚女, 嬌生慣養, 唔駛鬧, 剩係俾面色佢地睇, 已經入房開窗跳樓！嚇死人！
大嬸其實鬧人兇小小, 一般都是善良之輩！
有時小弟唔小心撞親個頭, 起咗個高樓, 問佢借D人奶駛駛, 查在患處, 用木（劇）力壓！好快冇事！大嬸多數冇托手踭, 爭在冇叫我自便吧了！
想起童年舊事, 鬧仔也成了趣事, 借人奶更充滿了温情！
|
|
|
真的談天說地
