 醫者父母心? |
日期：2014/09/08 16:37
留言者：Hawaiian
 |
這個夏天,發生了令自已悲傷和憤怒的事,兩個至親的長輩同時傳來患上癌症.阿姨患的是肝癌,發現時己是末期,最後己平靜地走了.居住在香港的姑姐,同時傳來壞消息,說是患有胰臟癌,接連聽到壞消息,心情下沉之餘,唯有好言安慰.
姑姐八十歲了,除了一些老人小毛病,健康也算正常.據老表告知,近月來覺得個胃頂住頂住,飯量減少,但不久則餓要再食.起初不以為意,認為是小問題不肯去看醫生.但老表們堅持去檢查一次,因為公立醫院要排期久候,所以約了一個較有名西醫.花了六七萬元做了一次詳細體檢,得出結果是胰臟癌.主張馬上排期做手術,費用約在七八十萬之間,這個數字非月入萬元的老表們可負擔.商量之後去見另一醫生,醫生說無論點幫忙收費亦要三四十萬,並告知因為胰臟是大手術,康復期較長,要預多三四十萬費用,如無問題可立刻排期做.
問題最大的是這筆費用,你說怎麼辦?!商量之後試闖急症室,在瑪嘉烈醫院住了三晚,做了切片化驗.主診醫生告知胰臟係有一個瘤,一切結果兩星期後會告知.因為胰臟是在中央,如動手術先要把十二指腸,膽管和部分胃切去,同時評估胰臟要切割幾多,八十歲的老人能否承受等等.
兩星期後得到結果,個瘤係良性,唔係呢家嘢.各人都鬆一口氣,醫生話每三個月復診一次,監視其進展.
老表們仍放心不下,去見那兩個醫生.他們答複話,政府化驗係冇咪冇咯.然則點解你當時又話係呢?答話雖然冇化驗過,但以佢經驗,胰臟瘤百分之九十九係癌.我不知道當時老表們有乜反應.假如是我,肯定佢祖宗十八代的屁股開了花.還有百分一機會唔係,點解咁武斷,並主張馬上做手術,令病人驚餐懵家人大擔心.
後來同老友談起,佢話個醫生唔係當你姑姐係病人,係客人.着眼在這筆手術費,有時窮有窮的際遇,阿超着褲.假如是有錢人家,那一刀是肯定要捱了.
由此覺得自已當年鬧個醫生是對的.十年前五十七歲,有次見醫生量得血壓是86/131,佢話你的血壓上升了,正常應係在75/125,兩星期再來驗一次.結果係85/130,又兩星期後見佢,量得同樣數字.佢話你要食藥,我話你係醫生話要食咪食咯,自已係百分百相信醫生.點知佢開藥每次都是四個星期,食完就要去見佢開單買藥.如是者過了一年有多,有次同一個做護士的朋友飲茶,其間提到此事.佢話以你的年紀,這個數字唔係高,點解唔睇多一段時期先食藥呢?現在你每日食5mg係好輕微,而且血壓好穩定,使唔使個個月去見佢呀?通常一般醫生在這情況下一次開三個月的藥.
見醫生時要求佢開三個月藥被拒,我話其他醫生可以開三個月,點解你唔得呢?而且我的血壓十分穩定,在80/130上下之間.點解重要個個月見你?我還要工作,見一次要等個幾兩個鐘,見你唔夠五分鐘,大半日時間冇咗.如果你每個月開藥要計錢,咪計咯,開單來我照畀,只要唔好我兩頭走浪費時間.你估佢點?立刻板起面孔以教訓口吻話:”我冇其他醫生咁唔負責任,我為你好睇住你.醫者父母心呀!你唔好咁無知,好心着雷劈!”此言一出,令我大動肝火!指住佢鬧:”以前的醫生就係!你條契弟唔係!係掠水!”
從此轉了醫生,三個月一次,有時去旅行開多一啲.其實我的血壓一向都在80-85/125-130之間,係唔使食藥.不過食開咗不能不食,第一個醫生為了綁住病人,每月有進賬才要個個月見佢開藥,枉我一向都信到佢十足,現在想起都嬲.
醫者父母心?嘿!嘿!!嘿!!!
 |
| |
Re: 醫者父母心? 
