 番邦過年 |
日期：2009/01/22 09:42
留言者：Hawaiian
 |
年關逼近,臘鼓頻催.這是以前報紙經常見到的字眼,小孩子望過年,大人如過關,有錢的要張羅打點人情,冇銀的就如過難關.各有各的關要過.近日與在港的老友通電,有兩三個話明要玩失踪.因為現在身己溺在海嘯中,只靠一條氣水管伸出水面抖氣!在番邦過中國年,氣氛很淡.之前兩個週末在唐人街舞舞獅,擺擺年宵攤位,除了有些煎堆齋菜,其餘的日用品與平日無異.而且這些攤位如王小二過年,年比年少.以前擺滿一條街約五六十檔,越玩越縮,今年約得廿檔,原因是租金貴,而且好似射十二碼球,一腳過.只得一晚,遇上落雨時,檔主就淚隨雨下,賣食物的就血本無歸,還要賠上租金.十幾年前,Hawaiian貪過癮,投一個位玩下,當年租金一晚五百元,現在可能不止,出動了十多人,忙了兩三日一頭煙,結果呢?每人分得廿元,得啖笑,此後提起都怕.
這裏唔興拜年,也沒有派利是,[自已的小孩要派的,等他們知道是習俗],一切好慳皮.如果大年初一落在週未都OK,否則你想同人拜年都冇人得閒,個個要返工.初到此地時,覺得十分冇癮.如果當日遇啱個上司贈你幾句,一早開年,咁就乜癮都冇晒.
自從做了自顧人士,年初一無論如何都休息,也叫老妻取一日假,自已過年.一年之計在於春呀嘛!新年做些好意頭的事,起碼心安理得,以下係大年初一Hawaiian所做的事,有興趣不妨參考下,冇版權.
一早起床梳洗完,先打一個電話,打去邊?Goodyear輪胎公司,對方一接電話第一句必係Goodyear! Hawaiian隨答Thank you very much!跟住同家父母講幾句吉祥話,就吃鄉下過年應節食品,敝鄉稱做”豆撈”,其實係糯米湯圓,麻蓉或蓮蓉饀,撈起放在炒花生碎椰蓉沙糖中滾拌,使粘上外表,取其意有得撈!你睇Hawaiian幾冇大志,求其有得撈就算,都唔想發大達.然後一家開車去環島一圈,行一個大運.跟住去買三條牛仔褲,足夠Hawaiian一年穿㥸,[買富].中午食齋,開下齋先,但齋絕不能放白果!否則認真大吉利是!晚飯必有豆腐,有錢先可以鬥富,唔通同人鬥窮?當然新春每日都係播大鑼大鼓喜慶音樂,絕不聽粵曲,一下錯手整支”胡二賣仔”就暈得陣陣.
係唔係迷信?唔係!係心理安慰.人人都中意平平安安順順利利啦.
否則老友那年唔使頂住條氣,佢老婆係天主教徒,初一去買一本書,書名”我想到天堂去”,晚飯重攞景-----苦瓜炒牛肉, My God!老友當堂吹鬚碌眼!
 |
| |
Re: 番邦過年 
Dear Hawaiian,
身體健康 