 Re: 真的談天說地 ( No.1431 ) |
日期：2015/08/06 17:38
留言者：丫頭
|
| Re: 真的談天說地 ( No.1432 ) |
日期：2015/08/06 18:28
留言者：路過
 |
小弟入讀幼稚園那一年，KC已入中大。 
講番食野，總係覺得以前任何一間街頭巷尾的飯店的小菜，如菜遠牛肉、生炒骨、魚雲羹、乾炒牛河，都好食過現時任何一間貴價食肆同樣菜色。
唔落豬油唔好食。  |
|
| Re: 真的談天說地 ( No.1433 ) |
日期：2015/08/06 20:57
留言者：KC
|
舊日做節餸菜
以前日子唔係餐餐大魚大肉, 要過節（如春節,瑞午, 中秋, 之類）才會有魚有肉食,有靚湯飲.
KC屋企過節, 通常會有鮑片食, 係墨西哥果隻車輪鮑（而家賣到五六百文一罐, 一不留神就買到假貨, 剩係得張招紙係真, 真慘！） 車輪鮑用蠔油簡簡單單整吓, 已經十分好味, 當然要用生菜做底啦！
過節仲一定有茄汁大蝦碌, KC唔食頭, 專食中間部份和蝦尾, D壳都好好味, 落手揸住食, 好有快感也！
大"先"鷄（真係好大隻, 成三四斤重都有）用湯淥熟斬件就食得！鷄脾通常成隻食,分倒一隻就快活過神仙了！通常小孩子乖就有, （KC當年梗有啦！）
有時煲牛白腩蓮耦湯, 好似有加D髮菜, 蠔士, 十分和味, D牛白腩點D 余均益果隻辣醬就至正！（我而家都係只食呢隻辣醬嫁！）
有時煲豬肉湯（個陣人人識唱, 眼光光, 飲咗豬肉湯.）最鍾意就食D淋嘅半肥瘦豬肉, 點生抽已好好食, 至於有粉腸仲正, 點D醬在口中嚼, 很有咬頭, 有D再窮D的小朋友教KC（我未試過）用條線綁住條粉腸, 嚼完一吞就拉番出泥, 點醬再食, 可以食好耐也！﹝吞咗就冇囉！﹞
近年我都好少一大棚人食呢種家庭式的做節餸菜了！
唉！去酒樓, 又點食倒D咁正嘅嘢吖！
 |
|
| Re: 真的談天說地 ( No.1434 ) |
日期：2015/08/07 12:26
留言者：KC
|
舊日的食不厭精
以住D人冇乜嘢食, 乜都食落肚, 但又唔係就咁食, 加工又加工, 加工都精彩絕倫！
例如一味抽皮, 簡簡單單, 就食得KC終身難忘.可能以往是先用濃鮮鷄湯煨味, 又用豬油製作, 加上選用一級抽皮﹝我見有人剩買抽皮, 而抽肉小販另外平賣！﹞新會D柑又係咁賣, D皮仲值錢過D肉！估唔倒喱！
至於釀鯪魚又係功夫多到死, 只見工人成個下畫準備, 先將D肉攞出加上蝦米,豬肉之類.（我只係旁觀,唔識做！）啄成魚餅, 然後釀番落D魚皮殼處, 成條魚還原, 再煎到香噴噴, 加一個獻！做番D裝飾在碟旁（葱之類）真係諗起都流晒口水.
唉！而家出街食D原裝鍚紙包裝釀鯪魚, 味道完全唔係果回事, 加個鉄板上, 又話上菜！仲渣過我細時D家常菜！
有次去澳門食砵仔禾蟲, 竟然係用禾蟲乾製作, 得個砵仔一樣, 連油炸鬼在面都欠奉, 砵仔蒸魚腸又係一樣.冇晒KC兒時食的味道, 真渣！
KC好耐冇食過一種叫鴨腳包的食物了, 以前D燒臘檔有得賣, 整一隻入戲院一路食一路睇戲, 真一流也！
 |
|
| Re: 真的談天說地 ( No.1435 ) |
日期：2015/08/07 16:35
留言者：Hawaiian
|
睇KC兄的懷舊食物,現在只能吞口水.我是六十年代中來港,也搭得到食這些食物的尾斑車.那時一般的店舖還興做禡,舊曆初二十六,晚餐的餸菜必比平時豐富.
那些年的每日下午三點三,在南昌街有男飲茶(在油麻地品心也是一樣),茶博士大叔一見你坐下,就會拿來你要飲的茶葉和焗盅.每盅茶只是一杯多一點,大叔不停為茶客加水,務使茶盅長時間有水,這可以講是水滾茶靚.其除了招呼客人外,同時還有時間很悠閑和茶客搭訕,他的耳邊揳滿人送的香煙.賣點心的大嬸永遠聲大大叫賣,沒有點心車.過肩一條帶繫住托盤,雙手和肚腩要幫一幫力才能把整盤點心乘托住.一般甜品如蛋撻瓜蓉酥....之類是沒有遮蓋,個人甚少食.因為大嬸叫賣時,或多或少都加了些料.
最近一次返港和友人茶聚,茶樓擠滿人,坐下很久才有人拿了一壺從暖水壺倒出來的溫吞水.飲完一壺後想加水,環顧四周好難找到一個侍應,服務員與人客是不成比例.即使偶然見到一個,向其舉手示意,但也裝作看不見.友人只有自已去加水,問是否獨是這間係咁?答:間間都一樣,難請人.
以前上茶樓是享受,現在呢?不敢講. |
|
| Re: 真的談天說地 ( No.1436 ) |
日期：2015/08/08 12:13
留言者：KC
|
口腹之慾
講開食嘢, KC就諗起細時食D五花腩肉, 半肥廋豬肉, 用蝦醬在飯面蒸己是無尚享受, 一唔係用腐乳加糖蒸都得, 一大碟肥油, 香噴噴, 食兩三碗白飯都得也.
一唔係用D面鼓醬去炆D五花腩, 真係好鬼好味！送飯真一流也.
而家人人怕膽固醇, 冇人食豬油, 又怕動物脂肪, 改晒食植物油, 誰知植物油至多反式脂肪, 你話死唔死？
KC真懷念後生冇有識死的年代, 食嘢根本唔駛考慮什么膽固醇, 什么反式脂肪,什么纖維素（食多D菜, 生果就有啦！）以前食豬潤, 粉腸, 牛雜, 真係諗都唔駛諗, 人生多美好！
而家食碗及第粥都怕超標, 冇晒人生樂趣！
諗諗吓, 好耐冇食過霉香鹹魚啄豬肉嘞！用D半肥廋豬肉, 工人用两把刀啄, D聲好有節奏感, 加D霉香鹹魚, 蒸熟咗好鬼死香也.
哦！好耐冇聽過啄豬肉的聲音了！
KC發覺凡係好食嘅嘢, 而家D專家都話有害, 肥豬肉啦, 豬油啦, 豬內臟啦, 乜鬼都話唔食得. 真慘！
搞搞吓真係冇啖好食！
各位！你話係咪嘞？
唉！幾時等KC放縱吓自已至得！
|
|
| Re: 真的談天說地 ( No.1437 ) |
日期：2015/08/09 09:30
留言者：KC
|
KC童年零食
談到KC小時候的零食, KC最懷念的是, 一種厚厚的夾餅, 表面烘得棕色脆脆的, 內面軟軟的, 用花生混沙糖做涵料, 果陣賣一毫子一大塊, 約四份一個园, KC兒時食一塊己夠飽.（當年比較難有飽的感覺, 現在反而很少餓的感覺！）近年很少遇倒有得賣, 反而D鷄蛋仔（一格格果隻）就大行其道！
仲有一種好原始的, 叫啄啄糖, 賣者用一鉄器, 一塊一塊由盤中果舊大糖, 啄出嚟, 果陣斗零 (五仙) 都有交易, 記憶中只係得甜味, 不過當年冇乜好嘢食, 咁都好好嘞！
KC早上返學前, 街坊中有一老人家, 叫顏姐婆（自己得一個人, 冇親人）四點幾起身煲白粥賣.（係有白果個隻！）綿綿的, 天下第一美味！加上一條新鮮油條或牛脷SO, 滋味至今戀戀不忘, 後來晋成街遷拆, 顏姐婆被同屋的亞二哥（做包伙食）連同一齊遷戶, 相信而家都返咗舊時果度矣！
至於缽仔糕, 鬆糕, 白糖糕, 雲片榚, 雲吞麵, 魚旦河, 全部而家仲有, 但味道已大不如前了！
就雲吞麵來說, 剩係D銀絲細麵（真係好幼嫁！）都食唔番！湯又唔一樣, 以前用鮮蝦, D壳可以煎湯, 好味多矣！
魚旦用D牙帶魚, 用手在一大木盤打（KC同個潮州佬熟, 有時佢都俾我打两野,好頂癮嫁！）跟住用一隻手, 逐粒唧出嚟, 成一盤盤圈的魚蛋, 排得很整齊, 再用慹水浸熟就成了, 好食過而家D好多, 彈牙嘅！
唔知有冇人記得呢？
最出名的香港仔山窿魚蛋！正！
|
|
| Re: 真的談天說地 ( No.1438 ) |
日期：2015/08/10 13:08
留言者：KC
|
豬油撈飯的日子
在KC成長的歲月, 食物十分匱乏, 當沒有餸吃飯時, 家中有一瓶豬油, 放上熱辣辣的白飯上, 加上小許鼓油, 乃天下第一美味！
如果再加上一隻荷包蛋, 真係幸福到不得了！（現今只有太陽蛋, D人都唔識（費事）煎荷包蛋了！）
以前KC屋企的家規是, 有功者（有籍口遲返）留飯不留餸, 無功者, 飯餸不留！所以有時就會出現上述景况！
家中兄弟姐妹吃飯, 都要出招, 第一碗例牌半碗, 第二碗才大力裝滿！（因為食半碗一定快過人地一大碗, 有得添飯, 遲了就冇飯添了！）
去飲也要用呢招, 食翅先吃半碗（人地上菜時先出招, 今日唔開胃, 半碗啦！）跟住食完（人地食一碗熱辣辣的翅, 一定唔夠你快！）出招話: 哈, 今日D翅又幾好味渦, 開胃晒添, 再整多碗滿嘅！（以前去飲, 翅多數有十三四碗份量嘅！）
至於到食鮑魚, 第一件挾上手, 例牌失手, 跌咗係面前抬面, 再挾第二件上碗, 然後交待一句, 咪浪費, 挾埋枱面個件, 又得米開雙！
現今飲宴, 人人減肥兼厭食！冇呢支歌仔唱了！
|
|
| Re: 真的談天說地 ( No.1439 ) |
日期：2015/08/10 18:07
留言者：麥友成
 |
豬油渣點沙糖。 |
|
| Re: 真的談天說地 ( No.1440 ) |
日期：2015/08/10 20:51
留言者：KC
|
當年見工人整豬油好易，肥豬肉放落鑊，煮下煮下，就出了一鑊油，又有豬油渣食！
到KC近年自製豬油，居然失敗！
不止冇油，全部成炭！
懷舊不成！結果去了一間宣傳有豬油撈飯的高級食肆才食倒！
 
至於豬油渣，有麵檔仲有油渣麵賣，食過一次！冇厘味道！吹漲！
 |
|
| Re: 真的談天說地 ( No.1441 ) |
日期：2015/08/11 00:35
留言者：Hawaiian
|
| Re: 真的談天說地 ( No.1442 ) |
日期：2015/08/11 01:42
留言者：KC
|
| Re: 真的談天說地 ( No.1443 ) |
日期：2015/08/11 05:23
留言者：四姑娘
 |
KC:
潮商隔離就是小妹出嫁的地方，Copper Chimney樓上！
你漏了我的母校：香港大學向東行般含道第一間學校聖士提反堂呀！原來你是我家姐校友喎 |
|
| Re: 真的談天說地 ( No.1444 ) |
日期：2015/08/11 13:29
留言者：KC
|
果區好多名校, 聖類斯就很多人入讀港大！在培英山腳就是孔聖堂！
再過有聖士提反女校！高主教也是名校！
最近斬了四棵大樹的地方, 般咸道, 就是KC往時日日經過的地方！
|
|
| Re: 真的談天說地 ( No.1445 ) |
日期：2015/08/11 11:27
留言者：麥友成
|
我就經常出入戴麟址康復中心，冇精神病架~只係有個堂大佬在那裡做配藥啫~  |
|
|
真的談天說地
